Ahlan: Zamu Kirkiri Gasa Ta Yan Kasa Da Shekaru 13 Da 15 A Kano

Daga: Isma'eel Abba Tangalashi


Shugaban Hukumar Kwallon kafa ta Jihar Kano kuma member a hukumar Kwallon kafa ta Nijeriya, NFF, Alhaji Sharu Inuwa Rabiu Ahlan ya kuduri aniyar kirkira da kuma daukar nauyin gasan wasan kwallon kafa ta U-13 da U-15 a fadin Jihar Kano.


Kwararren shugaban ya bayyana haka ne a yayin hira da yayi kai tsaye da gidan Radion Aminci Mita 103.9 dake Birnin Kano.


Yace hukumar sa zata hada kai da kungiyoyin kwallon kafa dake fadin Jihar Kano domin kirkirar kananan kungiyoyi ta U-13 da U-15 daga cikin su domin tunkarar gasar da za a dinga gudanar dashi sau biyu a shekara.


Za a yiwa gasar lakabi da 'Ahlan U-13 da U-15'.


Bayan zangon kowanne kaka, za a zabi 'yan wasa masu hazaka domin wakiltar Jihar Kano a matakin kasa a gasar nan mai taken 'Zenith U-13 da U-15.