Gasar Zakarun Nahiyar Afirka_ Lobi Stars Taba Marada Kunya

By Isma'eel Abba Tangalashi


Kungiyar Kwallon Kafa ta Lobi Stars ta garin Makurdi ta tsallaka zuwa ajin rukuni na gasar cin kofin zakarun nahiyar Afirka mai taken CAF Champions League bayan ta doke kungiyar kwallon Kafa ta Gor Mahia daga kasar Kenya da ci biyu babu ko daya a wasan da suka doka a yammacin Asabar dinnan a Garin Enugu.


A wasan farko dai da aka buga a makon da ya gabata, Kungiyar ta Lobi tasha kashine a hannun Gor Mahia da ci uku da daya a can kasar Kenya, hakan yasa tilas wakiliyar ta kasar nan ta sami nasara a kalla da ci 2 babu ko daya, wanda shine zai bata damar tsallakawa zuwa ajin na rukuni.


Dan wasa Sikiru Alimi ne ya jefawa Lobin kwallaye biyun da suka bata nasara a daidai mintuna na 70 da kuma 88.


Lobi Stars dai itace kungiya daya tilo dake wakiltar kasar nan a gasar wasannin zakarun Kungiyoyin kwallon kafa ta nahiyar Afirka a bana, bayan da hukumar kwallon kafa ta Afirka wato CAF ta rage guraben da take bawa kasarnan domin rashin tabika abin arziki a gasar.